Metzelnamikit!

Taja tay tina kwak ajkwechuat?

Kwak niajkwechua, miak nechilwiat: Bless you. Wan naja nina: Thank you.

Ka nuchan tik Los Angeles, ijkiuni titaketzat tik Inglestaketzalis. Te nikmati taika. Inte aka ina tatka kwak titatasit ush timuyakapitzat. Kwak tiajkwechuat, kia. Ken ijtuk?

Ne tay inat tik Ingles kwak se ajkwechua, Bless you, kineki ina "ma metztajpia yek ne Teut". Sejse inat ka pejket inat ijkiuni ikman kwak nemik ne kukulis bubonicaj (nusan itukay ne Wey Mikilis), ijtik ne tujtunal ipal ne papa Gregorio, ika kimatit katka ka musalua ne kukulis kwak se ajkwechua.

Melka uni, sejseuk inat ka nemi ukse taika. Inat ka ikman miak kimatit ka ne tutunal weli kisa tik tuweyka kwak tiajkwechuat. Yajika, tiktajtanit ma techtajpia ne Teut pal te kiajkawa ma panu tatka tay te yek kwak ajkwechua se.

Te nikmati katiawel ne tejkia.

Nikmati ka nujme ne taltikpak, tik tejtechan tekenhat, kipiat se pal inat kwak ajkwechuat. Tik ne tejtechan Arabe inat "Shina ka wey ne Teut". Ne Hindu inat "Shinemi!" ush "Shinemi yek!". Tik Rusia, kwak ajkwechuat ne ipilawan se, ina "Ma shikpia yektunal!", wan su te, "Ma shimuchiwa wey!" Ken tikmatit, tik Latinoamerica, tik Castillaj inat Salud. Tik España inat Jesús.

Niknekiskia nikmati tay inat tik Nawat. Anka te inat tatka. Sejse inat ka su tiajkwechua, ne Nawataketzat yawit metzilwiat: Metzelnamikit!

• ajkwechua estornudar
• musalua se pega
• muyakapitza sonarse la nariz
• tatasi toser
• tunal espíritu, "tunal"
• yektunal salud