2 feb 2014

Ne siwapil kuchtuk

Ne Washapantepet

Nemit miak yejyektzin tepet tik San Salvador. Ne mas yektzin, ne tepet itukay Washapan.

Kwak nichikitik, ninemik tik se techan itukay Aguilares, ne nemi itech Washapantepet. Nikita katka ne tepet mujmusta wan sujsul niktasujtak. Taika? 

Uni tepet muita ken se siwapil kuchtuk. Ijkia! Kipia itzuntekun iwan ne ikwatapal, ne iyak wan ne iten. Wan nusan kipia ichichiwal! Ne nupipi nechilwia katka se cuentoj ipanpa ini siwat kuchtuk.

Ikman, teuk nemituya ne tepet. Semaya nemituya se wey techan ipal ne Metzali. Ne itekuyu ne techan kipiatuya se isiwakunew sujsul galanchin. Muchi ne Metzali kitasujtaket. Ne siwapil kintasujtak nusan.

Se tunal, ne siwapil kukushki. Kimatki ka yawi miki. Muchi ne Metzali chukat. Yaja kinhilwij:

“Maka shichukakan! Senpa niu-nimetzintajpia wan niu-nimetzinpachiwia”.

Mikik. Muchi ne chanejket muchtechtijket.

Ka tayua, ulinik ne tal. Sujsul majmawket.

Kwak tanesik, kitaket ka nemi se yankwik tepet inawak ne techan, wan ne tepet muita ken se siwapil!

Wan muchi kimatket ka yaja né. Nemituya inwan, pal tajpia wan kipachiwia ne intechan.

  • chanejket habitantes
  • chichiwal teta, pecho
  • ijkia es así
  • kipiatuya tenía
  • kuchtuk dormido
  • kukushki enfermó, se puso enfermo
  • -kwatapal frente
  • Metzali indígena(s)
  • muita se ve
  • mutechtia ponerse triste
  • nemituya estaba, había
  • -pachiwia vigilar, velar por
  • -pipi hermana mayor o tía
  • siwakunet, -siwakunew hija
  • (-)tajpia cuidar
  • tanesi amanecer
  • -tasujta amar
  • -tekuyu señor, amo
  • teuk todavía no
  • ulini temblar
  • Washapan Guazapa
  • yaja né es él/ella

2 comentarios:

Alan dijo...

Sujsul galantzin!!

Anónimo dijo...

Tejkia, niweli nikita ne iishkaliyu ne siwat wan ne chichiwal nusan, yaja muita kuchtuk