12 feb 2014

Niajki nitachia Nantzin Paula

Paula se nantzin tamati wey,
wan tanawatia kwak weli
Yalua niajki Witzapan nitachia nantzin Paula López. Niajki iwan ume nukunpawan pal tikitat ken ijtuk, wan pal tiamatachiat se chiujchiupi ne Yankwik Sentaketzat ipal ne Bibliaj tik Nawat.

Tiknamikket Paula tik itajku ne techan, wan tiajket ka ichan. Ka né, nipejki niamataketza sejse takutunchin ipal ne Takutun Ume ipal ne iamaw Matay. Nemanha niamataketzki ne casoj ipal ne Kuyankua, wan pal tami, ne Takutun Ume ipal Taneshtilis.

Yaja pajpaki wan nechtajtanilia miak ipanpa tay niamataketza. Melka yaja inte kimati sejse palabraj ika yejemet yajyankwik, su nikneshtilia se palabrajchin yaja kimatki yek. Inak ka ne takat kipatak muchi uni, yaja taishkejketza wan yultaketza wey pal kichiwa uni itekiw!

Yaja inak ka yaja pajpaki kwak kiajsi ken weli kitukaytia se tik Nawat. Wan nechmakak se machiut:

"Sejse kinutza ne mesa mesaj! Naja, kwak niyultaketzki, nikitztuk se tet petznaj. Wan ninak: su tiktaliat se tet petznaj iwan ijikshi, mukwepa se mesaj. Kwakuni niknutza se petznaj iwan ijikshi."

Nusan igustuj kitukaytia ne patio "shuchimet". Wan igustuj ina "yek peyna" kwak tanesi hasta tajkutunal.

Paula se nantzin tamati wey, wan tanawatia kwak weli. Naja nimumachtij wey iwan.

Kwak titakwajket ka teutak, Paula kikutun se kutkut. (Shikejeku tina tay uni: yaja se itakil muita ken ne melon pero chiltik ka ijtik...)

Sujsul nipajpaki ika niasneki Witzapan senpa ne tunal 21 ipal ne Metzti Ume!

  • amatachia leer
  • amataketza leer (en voz alta)
  • casoj cuento, parábola
  • -ejekua probar, intentar
  • -ishkejketza considerar
  • ken ijtuk qué tal
  • kikutun cortó
  • Kuyankua un ser mitológico pipil
  • machiut ejemplo
  • Matay Mateo (el evangelio)
  • -namiki encontrar (a una persona)
  • -neshtilia explica (a alguien)
  • nikitztuk he visto
  • pajpaki = paki
  • -pata cambiar, traducir
  • petznaj plano
  • takutun parte, capítulo
  • tamati saber de muchas cosas, ser sabio
  • tanawatia dar consejos
  • Taneshtilis Apocalipsis (se amat ipal ne Bibliaj)
  • tik itajku en medio
  • -tukaytia nombrar
  • Yankwik Sentaketzat Nuevo Testamento
  • yawi tachia ir a visitar
  • yultaketza pensar



2 comentarios:

Alan dijo...

Sujsul padiush ipanpa ini tajkwilul. Nugustoj wey ini fotoj! Nimetztajtani ma shiktajpalu Paula nupanpa kwak timukwepa tiaw tikita wan ma shikilwi ka senpa nikelnamiki.

Alan dijo...

Nusan nina ka anka chiupi uij ne Taneshtilis. Tay tina? Te semaya tik Nawat, nusan uij tik Ingles, tik Griego, tik Castillaj... ;)