Se masat tik Metrocentro

Seujti se masat inak ka yasneki ne weytechan ka kinekituya kishmati. Pejki nejnemi wan yajki yajki, wan kwak panutiwit miak horaj, ajsik.

Yaja pashalua ijtik ne ujti. Ne weytechan tetekia wey, nujme munamiki iwan tukniwan, wan ne ujujti tejtentuk iwan kajkal wan cajcarroj.

Pejki sutawa. Witz se tawikani wan kitak ken ne takamet wan siwatket kalakit kalijtik.

"Nemit mujmutalijka, nemit mujmutalijka!" tzajtzi se takat.

Ne masat kinekituya musewia, yajika yaja nusan kalak, kitashtawij ne takat wan mutalij.

"Ini galantzin!" yultaketzki.

Kwakuni ne tawikani pejki nejnemi. Kwak pejki, ne masat majmawi chiupi ika te keman nemik tik se tawikani, pero kitak ka te panu tatka wan nakak kita muchi ne techan tik ne tejtentzin. Kishpitza ne ejekatzin ijtik ne tentzin wan mumati ajwiak.

Nemanha ne tawikani muketzki tik se kan itukay Metrocentro, wan yaja kitak ka muchi kisat tik ne tawikani. Yaja nusan kiski wan pejki yawi ipan muchi.

Kitak takamet, siwatket wan kujkunet pashaluat, tajtaketzat, takuat, takwat wan atit. Panuket ne hojhoraj hasta pewa mayana. Pejki kita ka nemit miak kan weli yawi takwa. Katiawel ne mas yek? mutajtanilij.

Nemituya se itukay Ne Tijlan Campero. Uni muita yek, pero né kalijtik sekmiki wan pewa ajkwechua, wan kiski.

Kwakuni kitak seuk itukay Pizza Kal. Tik ne tentzin nemituya ne amat kan ina tay weli mukwa. Ne pizza muita ken se pupusaj majwey pero kistuk muchi ne yayu wan musalujtuk ijpak ne tishti wan tatak. Melka uni, miak kikwat nemit wan inat ka sujsul ajwiak. Kinekituya kiejekua, pero kilwijket ka nemituyat miak tejchiat tatenpan pal kalakit, kichiwat se ken se weyak ikwitapil kuat, achka kipia se kilometroj, wan ishtunat sujsul pal ajsit ne tentzakka! Yaja inak tik iyuluj, mas yek niaw nalmukwepa ukse tunal, wan yajki.

Ashan teutaka wan tea kineki pashalua, nemi pal mukwepa tik ne kojtan, melka amiki. Kwakuni, kitak se kan nemituyat miak mesaj, itukay Tajtzin Donut. Muita yek... pero tentuk.

Pero te wejka nemituya seuk mas chikitik kan te nemituya aka. Yaja munutza tik Ingles, The Coffee Cup.

"Ini kia muita galantzin," inak, wan mutalij itech se mesajchin. Kiski se siwapil, ishpakik yektzin wan kitajtanilij ne masat tay weli kitalilia. Kitajtan se cocacola. Ne siwapil kalwikak ne asesek wan kilwij:

"Makwil dolar, su tikita yek."

Ne masat kitashtawij ne siwapil, wan né nakak nejmachnemi, kiuni ne icocacola wan kita ne tukniwan pashaluat.

Ne siwapil ajsik itech senpa kitajtanilia su nemi yek wan su kineki ukseuk. Ne masat kilwij ka te kinekituya tatka ashanchin, wan padiush. Ne siwapil taketzki senpa:

"Nikpia se pal nimetztajtanilia, su niweli. Naja te keman nikitztuk se masat pal ne kojtan ken taja witz mutalia kiuni se cocacola tik The Coffee Cup tik Metrocentro. Ken ijtuk?"

Ne masat kitak ne siwat. Wetzkak chiupichin, wan kilwij:

"Tikitakan: keski masat tiknekiskia taja ma wikikan kiunit se cocacolaj ka MAKWIL DOLAR????"

• ajkwechu estornudar
• asesek soda, fresco
• ejekatzin brisa
• ejekua probar
• ishpaki sonreir
• ishpitza soplar
• kalijtik adentro
• kuat serpiente, culebra
• -kwitapil cola
• majwey gigante
• masat venado
• muita se ve
• mumati sentirse
• munamiki toparse con
• munutza se llama
• musalua pegarse
• mutalijka asiento
• niaw nalmukwepa volveré aquí
• -talilia ponerle, servir
• tata quemarse
• tatenpan fuera
• tawikani autobús
• tentzakka puerta
• tentzin ventana
• tetekia terrible(mente)
• teutaka ya es/era tarde
• tikitakan vamos a ver
• tishti masa
• tzajtzi gritar
• wetzka reirse
• weytechan capital
• yultaketza pensar