9 feb. 2014

Wolfgang Amadeus Mozart

Wolfgang Amadeus Mozart
(1756-1791)
Muchi tikmatit ka Mozart se wey compositor ipal Ewropa. Keski tikmati ipanpa? Ashan tiawit tikitat su wey o chiupi! Su tikneki, weli tikaki sejse itakwikalis Mozart kwak tinemi tiamatachia!

  1. Ken itukay ne tal kan nesik Mozart.
  2. Keman nesik? (Maka shikchiwa trampaj!)
  3. Ken itukay ne techan kan yaja nesik?
  4. Ken itukay iteku?
  5. Wan ne inan?
  6. Keman pejki tatzutzuna?
  7. Tay itekitilis?
  8. Ken itukay ne isiwaw Mozart?
  9. Keski shiwit kipiatuya kwak mikik?
  10. Kan mikik?
Kwak tikpachua ka nikan, tiaw tiweli tikita ne najnankilis...


Mozart kwak kunet
(nikan kipiatuya chikwasen shiwit)
NAJNANKILIS:
  1. Nesik tik Austria.
  2. Nesik tik ne shiwit 1756.
  3. Nesik tik ne techan itukay Salzburg.
  4. Ne iteku itukay Leopold Mozart.
  5. Ne inan itukay Anna Maria.
  6. Pejki tatzutzuna kwak kunet.
  7. Yaja tajkwiluj musicaj wan tamachtij tatzutzunat.
  8. Ne isiwaw itukay Constanze Weber.
  9. Kipiatuya 35 shiwit kwak mikik.
  10. Mikik tik Viena, ne weytechan pal Austria.


Wolfgang Amadeus Mozart (1756-1791)

  • Nesik tik Salzburg, Austria, tik 1756. Itejteku Leopold wan Anna Maria Mozart.
  • Kwak yaja piltzin, muitak ka welituya tatzutzuna sujsul yek. Ne iteku wan ne inan kiwikaket pashalua nujme Ewropa. Yajket ichan miak tatuktiani ika muchi kinekituyat kitat ken tatzutzuna ne piltzin Mozart.
  • Kwak takapiltzin, Mozart yajki Paris. Kineki muchiwa se wey compositor ka né pero te welik. Mukwepki ka Salzburg. Yajki tekiti tik itechan ipal ne weypalej.
  • Te kinekik naka tik Salzburg. Kiajkaw ne weypalej wan yajki Viena, ne weytechan.
  • Tik 1782, munamiktij iwan Constanze Weber. Ne iteku Mozart te kinekituya ma munamikti iwan.
  • Kipiatuyat chiupi tumin. Ne Mozart te yek iwan ne tumin - wan ne isiwaw nusan te! Kipishket ume ipilawan.
  • Uni shiwit, Mozart kichiwki se wey operaj itukay Die Entführung aus dem Serail.
  • Inat ka ne tatuktiani kikakik wan mutajtawelij ka ne imusicaj "kipia sea miak notaj". Inat ka Mozart kinankilij: "Semaya kipia ne nojnotaj munekit!"
  • Mozart nakak tik Viena wan muishmatki nujme ken se wey compositor wan tatzutzunani.
  • Kwak semaya kipiatuya senpual-kashtul shiwit, kukushki wan mikik.
  • Melka nemik yultuk chiupi shiwit, Mozart kichiwki anka chikwasen-tzunti takwikalis. Ijtik yejemet nemit sejse wey operaj ken Le Nozze Di Figaro, Don Giovanni, Così Fan Tutte wan The Magic Flute. Nusan kichiwki sijsinfoniaj, cojconcertoj ipal ne pianoj, ne violin wan sejseuk.
  • Ne musicaj ipal Mozart ashan itukay "musicaj clasicoj". Sejse nusan inat ka Mozart ne mas wey ipal muchi ne cojcompositor. Ne tay tikmatit ka tejkia, sujsul miak nujme ne taltikpak kitasujtat ne imusicaj Mozart wan kikakit iwan pakilis.

  • muishmati conocerse, ser conocido
  • mutajtawelia quejarse
  • nankilia contestar
  • nankilis respuesta
  • sea muy, demasiado
  • takapiltzin joven, adolescente
  • tatzutzuna tocar (música)
  • tatzutzunani instrumentalista
  • tekitilis profesión, ocupación, empleo
  • weypalej arzobispo
  • weytechan capital, ciudad grande

1 comentario:

alejandro zepol dijo...

tejkia Mozart yajki wey compositor. pero yaja kipishki mas itekiw kwak yaja nemi chikitik, ika ne tajtatuktiani sea inkustoj kinkaki tatzutzuna se piltzin. kwak yaja nemik takat kipishpi sujsul problemas pal kiajsi itekiw ika ne tajtatuktiani kipuluaj ne interes ka yaja. naj nina ka ne ne yultuk ne mozart yajki mutechtia...