Ne achtu muishnamikilis tik ESA

Ne muishnamikket: Donald J. Trump wan Hillary Clinton

Yalua Donald Trump wan Hillary Clinton nemiket tik ne achtu muishnamikilis pal kianat ne achtumutalijka pal ESA. Ne chanejket yawit kishpejpenat se yejemet ijtik ume metzti.

Ini tay panuk:

Trump inak ka Clinton te kipia ne "itachiska" pal muchiwa achtumutaliani. Wan "te kipia ne itajpal". Clinton kilwij Trump ka "weli nechilwia ipanpa nutajpal" kwak yaja kichiwa tay yaja kichijtuk ken ne Tajkwiluani ipal ne Kalpuli. Wan nusan kilwitij ka yaja te weli taketza ipanpa ne itachishka wan ne itajpal ika yaja kitukaytijtuk ne sijsiwatket "kuyamet, tijtishkwit wan pelumet".

Clinton nusan kineshtij ka Trump, melka yaja ina ka te tejkia, kishwelitak ne tasumalis tik Irak kwak né pejki. "Te tejkia," inak. Trump kinankilij ka yaja kitejtenej ne tasumalis tik Irak. Lester Holt, ne kiektalia ne muishnamikilis, kilwij ka nemit tajtajkwilul kan nesi ka yaja kia kilwij. Kwakuni inak ka itaishejekulis ne wey itajpal. Clinton semaya ishwetzkak wan inak "Aj, yek nemi"

Clinton nusan kitajtanilij ken ka kitennamiki ne achtumutaliani Vladimir Putin pal Rusia, wan taika kinujnutztuk ma kichiwa hackear ne ESA chanejket. Trump kinankilij ka teaka kimati ká kichiwtuk hackear ne Sennemit Democraticoj; su anka China, ush su anka se takat "ká mutamachiwa 400 libras" wan wetztuk tik ikal.

Kwakuni Clinton inak ka kakasiwi kwak kishkejketza ka Trump weli kiana ne nuclear codes. "Tikujkutiat ipanpa!" inak Trump. Clinton kilwij ka Trump te kipiatuya tatka pal kisuma ne Estadoj Islamicoj. Wan Clinton nusan kilwij ne ishnamikwan ne ESA ka te nemit pal kakasiwit ika kwak yaja muchiwa achtumutaliani kenhayuk yawit sentekitit.

Kwak Holt kitajtanilij Trump ipanpa ne itamatilis ka Obama te nesik tik ini taltechan, Trump kitejtenej Clinton wan inak ka yaja kitzinpewaltij. Uni te yekkaya.

achtumutaliani presidente
achtumutalijka presidencia
-ishnamik(wan) conocido(s) de
ishwetzka reir
itachishka su aparencia
kakasiwi preocuparse
kiektalia lo ordena
kinujnutztuk le ha hablado a (de -nujnutza)
kipiatuya tenía (de -pia)
kishwelitak aprobó
kitejtenej lo criticó (de -tejtenewa)
kujkutia ipanpa cansarse de
muishnamikilis contención
mutamachiwa pesar
-suma pelear
taishejekulis templanza, modestia
tajkwilul escrito, récord
Tajkwiluani ipal ne Kalpuli Secretaria del Estado
tajpaltilis vigor, fortaleza
tasumalis guerra, pelea
-tennamiki adorar
(tij)tishkwit holgazán(es), haragán(es)
-tzinpewaltia iniciar, comenzar
wetztuk acostado