Israel kiketza isentekitilis iwan ne UNESCO

Israel kiketza isentekitilis iwan ne UNESCO, ne Organizacion ipal ne Sejsenputzujtuk Talmet pal ne Kultuwas wan Tamachtilis. Yaja inak ini ika ne UNESCO kikwij ne tajkwilul ne sejse Arabejtalmet kishpanulijket ipanpa Jerusalen, wan ijtik ini tajkwilul, tiamatachiat ka ne Yudayujmet inte kipiat ilpika iwan ne techan Jerusalen.

Israel inak ka inte kineki kinnamiki iwan representantejmet ipal ne UNESCO, wan inte nemis tik ne sennemilis ne kichiwat ne Sejsenputzujtuk Talmet pal ne Kultuwas wan Tamachtilis.

Tik se tajkwilul, ne tatuktiani Israeltekat ipal Tamachtilis tejtenewa ne UNESCO wan ina ka "yejemet kipalewiat ashan ne temujmutilis islamistak."

Tik Israel, muchi kwalanit keman ne achtutatuktiani wan itepewa kichijket votar pal inat ka naka yek ne tajkwilul ne Algeriaj, Egiptoj, Liban, Marruecoj, Oman, Qatar wan Sudan kishpanujket. Ini taishpejpenalis inte kiajkawaskia Israel kalaki né kan nemi "ne patznaj ishpan ne mezquitaj" ken kinutzat ne musulmanmet ush "ne tepet ipal ne teupan tik Jerusalen" ken inat ne Yudayujmet.

Wan ne tay kinkwalania sea ne tatuktianimet Israeltekat ka ne tajkwilul inte ina ka nemi se ilpika pal ikman intzalan ne Yudayujmet wan né kan nemi santoj inpal ne Yudaismuj wan ne Islam.
Melka uni, ne taishpejpenalis kia ina ka Jerusalen importantej ipal ne "yey religion kipiat sema se teut."

Ne tajkwilul yawi mukwi wan naka yek ne martes witz.

• -ketza: detener, parar. 
• tamachtilis: educación
• tajkwilul: documento
• ilpika: vínculo 
• sentekitilis: cooperación 
• temujmutilis: terrorismo
• -ishpanua: presentar 
• Yudayuj: judío
• taishpejpenalis: decisión, resolución
• -kwi: adoptar, recibir.