Kwak achtu pejket pashaluat tik ne ilwikat, NASA senpa kinekituya kimati ken ijtuk iwan ne tuweyka kwak tinemit tik ne ilwikat, kan te kanaj etilis. Ika tik ne taltikpak, ne takat nejnentuk iwan etilis wan mupetejtuk iwan.
Wan yajika ne NASA kititanij ne inhumeshtin, Kelly wan Kornienko, tik ne International Space Station (ISS). Yejemet yajket kishtemuat ken ijtuk iwan inweyka kan nemi chiupi etilis, kan tepechtik, wan kan wey tatunalwia.
Achtu pashaluat, ne sitalpashaluanit nemit pal kichiwat tajtaejekulis tik muchi inweyka. Kwak tamit pashaluat, nemit pal mukwepat pal kichiwat ukseuk tajtaejekulis pal ne taishmatinimet kitat su nemi se tekenhayu tik inweyka. Nusan kichiwat ma ne iweyka kipiauk itajpal. Tik ne chinamit pal taishmatinimet, tajtaketzat ka yawit kiajsit Martes. Wan yajika, ini tajtaejekulis sujsul wey inpal.
Ne “Se Shiwit tik ne Ilwikat” ne itukay ini nejnemilis. Ini ne achtu pal kishtemua ken ijtuk iwan ne tuweyka tik ne ilwikat. Nusan wey ika Kelly kipia se ichachawayu wan ne taishmatinimet welit kishtamachiwat ne ujume wan kitat su nemi se tekenhayu intzalan.
Yek, tel, ini tay kiajsiket:
Ne taijtik ne tutakakilis kilwia ne tuweyka keman tiulunit wan keman tiejejkatuk, wan keman titzujtzunpilkatuk ush tiwejwetztuk tunakastan. Melka uni, kan nemi chiupi etilis, uni te tekiti yek wan ne sitalpashaluanimet te mumatit yek.
Tik ne taltikpak, tuujumiu wan tunakayu technejnentiat ika ne etilis techtilana ka talchi. Melka uni, kan nemi chiupi etilis, yejemet te technejnentiat. Ika te tekitit tik ne ilwikat, yejemet kukuwakit.
Ne taltikpak techpalewia ika te kiajkawa ma ne itawil ne tunal techajsi wey. Melka uni, tik ne ilwikat, te tatka techpalewia wan uni weli kijtakua tuewayu wan tuweyka.
- -chachawayu gemelo de
- chinamit comunidad
- ejkatuk parado
- ejkutik liviano
- etilis gravedad, pesadez
- -ewayu piel de
- -ijtakua dañar
- -ishtamachiwa comparar
- itawil tunal rayos del sol
- ka talchi en el suelo
- kukuwaki adelgazar, desmejorar, deteriorarse
- melka uni sin embargo
- mupetejtuk se ha desarrollado (de -petewa)
- -nakastan al lado, al costado
- -nakayu músculo de
- -nejnentia cargar, hacer caminar
- sentalpashaluani(met) cosmonauta(s)
- sitalpashaluani(met) astronauta(s)
- taejekulis exámen
- taishmatini(met) científico(s)
- tatunalwia asolear, exponer al sol
- te kanaj no hay, no existe
- tekenhayu diferencia
- tepechtik apretado, delgado
- -tilana jalar, atraer
- tzunpilkatuk de cabeza
- -(uj)umiu hueso(s) de
- ulini moverse
- wetztuk acostado
No hay comentarios:
Publicar un comentario