Ne ajkayawit Matthew yawi yawi ishta ajkuikpa wan inte musewia. Kichaluj ne atenpan Haitij ka tajkutunal. Tapitza iwan ejekat ajsi achka 220 km/h, nemi tapayawit tesajsay, wan ne at inte muajkawa wetzi. Ne ajkayawit kimiktija 3 tukniwan. Ne iakal se takat akalak, seki mikik kwak ichan muwilewki, wan se siwat sea kukushki wan inte weliket kitajpiat. Seuk takat mupuluj.
Tik ne weytechan, ne chanejket yulkakasiwit ipanpa ne apan Grise, ika tumakiski wan ne tisewianimet kilwijketa ne chanejket ma te munelwikan kitat ini espectaculoj tetekia pero yejemet inte kintakamatit wan semaya wetzkat keman sujsul tapitza ne ajkayawit. Nusan nemit sejseuk chanejket ne kipiat inchan ka iten ne apan ká munejnekit wan inte kinekit kisat tik inkal.
Neman ne taltakutun ne mas muchalujtuk ne Wey Tatzinu tik Haitij. Tikmatit ka yawi nemit miak tepeat wan tawilewalis, pero saman inte tikpiat yajyankwik inpal ika inte kipiat ken tanutzat tuwan.
Ne ajkayawit Matthew yawi kichalua Cubaj an ijtik sejse horaj, wan neman ajsis Floridaj. Hillary Clinton tamik inak ka te yasneki musentalia ka nepa ika inte kineki sajsayti ipanpa ne ajkayawit.
- ajkayawit: huracán, lluvia con viento
- tapayawit: temporal, lluvia fuerte
- akal: barco
- mupulua: perderse, desaparecerse.
- kukuya enfermarse
- chikawa: fortalecerse, intensificarse.
- atemi: llenarse de agua, inundarse
- tisewiani: bomberos
- munelwia: apurarse
- munejneki: hacer berrinche, hacerse de rogar
- sajsayti: ponerse en peligro
- yulkakasiwi: preocuparse.
No hay comentarios:
Publicar un comentario