Miktan tik ne at

Nemik se takat kitzkia michin. Wan kitak ka ajsik se chulet inawak. Wan yaja kitzkij wan kitilan wan kiwikak ka ichan.

Ne iweyka ne takat kiajsiket miktuk, wan kiwikaket ichan wan kitaket ka miktuk, wan kitukaket.

Wan se tunal kitaket ka ajsi yawi, wan kimatit ka kipiaya kashtul shiwit ka miktuk.

Yejemet kielnamikit kwak yajket kalkwit, kiwikaket ichan, wan kitaket ka kitukaket. Wan ken ka walmukwepki?! Yajika, kwak ne kitaket, nakaket kishpelwiat. Wan kwak kitaket ka yaja né, kisket mutaluat ika majmawit.

Wan yaja, kwak kitak ka mutalujket, kalak kalijtik. Kwakuni pejket ajsit chiujchiupi tachiat, wan kitaket ka yaja. Kisket senpa mutaluat.

Kwakuni kiski yaja kinnutza. Wan kwak kitaket yejemet ka yek, nian kukushtuk wan yek nesi, kwakuni weliket kinutzat, wan kilijket:

“Tejemet tikmatit ka taja timiktuka. Tejemet tikitaket ka tiajket talmetzkwit kwak ne tiatukuk, wan tikitaket ka timetztukaket. Wan ken ka unkan tiwitz?”

Ne takat kinhilwij:

“Su naja inte nikmati su naja niatukuk! Naja semaya tay nikitak ka ajsik nunawak se chulet wan kitzkij ne numey wan nechtilan tik ne at. Wan tipejket tinejnemit tik ne at. Nikitak ka kan ne chulet nejnemi, muchayawi se ujti kan panu. Wan yaja waktuk. Inte ajwi ne chulet.

Ne tenkal ipal at

“Wan kwak ne tiajsiket, nikitak ka kitapuj se tenkal. Yajasan at! Wan kwak tikalakket, yaja mukwepki senpa tatentzakwa.

“Wan nikitak ka musentepewat. Né nemit chujchuletket wan lajlamatket. Wan tejemet kwak ne techwikat, muchi munujnutzat pal yawit techitat. Kwak tami ajsit muchi yejemet, kwakuni kinutzat muchi ne mijmichin iwan ne kuleken kipitza ne chulet.

“Nikitak ka ajsit ne tenkal pal techishpelwiat, wan ne chujchuletket muketzat kinhilwitiliat, ka techwikatiwit ne tejemet takamet.

“Muchi yejemet né nemit tik ne sejseuk kal wan kipiat ne at. Ne at kikwit pal ne tay yejemet munekit: pal kiunit wan pal mumapakat.

“Neman tikpakat ne inhikshi wan ne inmey. Semaya ne inhishkalyu ne tay yejemet kipakat. Kwak tamit tikpakat ne inmey wan ne inhikshi, kwakuni timutaliat tikatinwiat. Melka nemit sejseki, tejemet kenhaya nemit pal tikatinwiat. Wan kiané tikchiwat muchi ne pejpeyna.

“Kipia sejse takat se taijtik kan nemi chiujchiupi at. Wan uni taijtik ipal teukwitat. Wan inte tikitat asu kiunit ne tay uni tiktaliliat. Kwak tayuaki, ne taijtik intea kipia ne ajat, wan inte tikitat keman ne kiunit.

“Wan nikitak ka kwak tatwi, naka istak nujme. Yaja kwak ne tunal pewa tachia ijtik ne at, yajika istaya ne at.

“Wan uni kwak ne tiu-tikwit uni at. Yaja ne kwak yawit yejemet kienchiwat. Munujnutzat wan yawit kitaliat ne inmey. Yaja né kwak ne mukaki ka tikwini tik tal. Yejemet inte kichaluat, uni ika kitaliat ne inmey wan kipachuat katani.

“Wan yejemet inte takwat ken tejemet. Kipiat se kwawit ne kichiwa ne itakil. Kwak tayuaki, inte nesi su naka se itakil, wan kwak yawi tatwi kipiaya tey ne tiawit tikwat uni tunal.

“Wan ne iiswayu inte nikita su shushuknaj wan te nikmati tay; semaya muita ka nesi kunyua. Wan uni kwawit kipia yejyey iiswayu. Wan yawi ka ajku, wan ne iiswayu nemit itech ne ikuyu, wan kenhaya ken se kutejkuni. Katani kipia ne se wan kipia ne seuk; uni yawi ka ajku.

“Nemik se tunal kwak nikitak ka welik nikwi se ne iwan tanutzat pal ajsit muchi ne mijmichin wan pal kichiwat kan panu. Inte sesan, nemit miak kuleken. Wan welik nikinaya se; wan kwak muketzki ne chulet, welik nikpitza naja. Kwakuni tapuik ne tenkal wan muchiwki ne ujti kan ne welik nikisa.”