Kanka witzet ne Lenka

Ne tipan Lenka tik Watajiawa

Nemi tik Kuskatan se techan Metzali itukay ne Lenka. Melka yejemet tea welit tanutzat tik ne Metzalitaketzalis, sejse yejemet kenhayuk tajtaketzat ipanpa ne ikman panutuk.

Tik uni takutun ipal ne republicaj miak te kimatit tatka ipanpa de Metzali. Semaya sejse tik se techan itukay Watajiawa (Guatajiagua) kielnamikit wan tajpiat uni tamatilis. Ini ne tipan techan kan nakaket sejse Metzali Lenka ne te kielkawtiwit wan kimatit ká yejemet.

Ashan miak inat ka tea nemit ne Lenka, inat ka mikiket. Yejemet kinekit ma tikishmatikan ka yejemet kia nemit. Kinekit techilwiat ka yejemet mumatit Metzali. Kichiwat yejyektzin kumal iwan tiltik sukit. Nusan kipiat se pal techilwiat ipanpa ken ajsiket ne innoywan ka Kuskatan. Ini tay inat ipanpa ken walajket ka nikan ne Lenka pal ikman.

Inat ka ne innoywan ne Lenka ajsiket ne tal pal Watajiawa kwak chulujket walajket tik ne tal kan yejemet nemiket sentapal ne weyat. Ne tatuktiani pal uni tal kintalultij wan kintuktij ma mutamutakan ka alamal, ika sejseuk kinekituyat kimiktiat ne esti Lenka pal ikman. Ne innoywan ne Lenka kitajtanket ne tatuktiani ma kinmaka cajcanoaj pal welit yawit ka alamal pal mutamutat tik ne weyat wan yawit ka miktan. Inak ne tatuktiani ka nemi yek wan kinmakak ne cajcanoaj. Ne innoywan ne Lenka kishijshikuket: te mutamutaket tik ne weyat, yajket kitemuat se yankwik tal pal nakat.

Yajket yajket tik ne weyat kitejtemuat tal. Te kinekituyat ma te kipiakan tatka su kiajsit, yajika kinashket tajtaiwan wan ijiswat kikalaktijtuyat ichtaka tik ne cajcanoaj pal kiwikat inwan. Wan ijkiuni ajsiket ne Shiktal.

Tik sejse takutun pal ne Shiktal te weliket nakat ika ka né nemituyat sejseuk te kenha ken yejemet. Kitemujket yajket wan tamiket kiajsit se tal yek kan welituyat nakat, kan nemituyat wey pal kikwat, ken ne kakawat, ne kamuj wan ne awakat.

Nakaket tik uni tal, wan nujme nejnenket kitalijket itukay tik ne intaketzalis wan kiane munutzat hasta ne tunal pal ashan.