Ne ajkayawit Matthew sea kishutak Haitij

An makwil shiwit neman keman talulinik ne 12 eneroj 2010, ne ajkayawit kiwilewki ukpa ne Republicaj Haitij, ini ajkayawit sea tetekia. Ne yalua ipal ne martes 4 octubrej 2016, Matthew tawilewki nujme nejnenki, tawilewki sujsul ne taltakutun Grand'Anse wan ne tatzinu-taneskan. Ne chanejket inte tatka kipiat ika muchi kipulujket, wan sajsaytit ika walajsis neman se uijkayu ipal takwal wan ne coleraj.

Matthew: ne tapayawit tapitza pak ne taltakutun kalakian ipal Haitij

Ne ajkayawit Matthew yawi yawi ishta ajkuikpa wan inte musewia. Kichaluj ne atenpan Haitij ka tajkutunal. Tapitza iwan ejekat ajsi achka 220 km/h, nemi tapayawit tesajsay, wan ne at inte muajkawa wetzi. Ne ajkayawit kimiktija 3 tukniwan. Ne iakal se takat akalak, seki mikik kwak ichan muwilewki, wan se siwat sea kukushki wan inte weliket kitajpiat. Seuk takat mupuluj.