Niajki nitachia Nantzin Paula

Paula se nantzin tamati wey,
wan tanawatia kwak weli

Yalua niajki Witzapan nitachia nantzin Paula López. Niajki iwan ume nukunpawan pal tikitat ken ijtuk, wan pal tiamatachiat se chiujchiupi ne Yankwik Sentaketzat ipal ne Bibliaj tik Nawat.

Ini Nawat!

Nugustoj niamatachia kwak niaw tik ne tawikani. Yalua, niamatachia Ne Tajtaketza pal Ijtzalku, se amat tik Nawat, kwak ajsik se takat ipal Asia wan mutalij nutech.
   

Niwelik nikita ka ne takat kita ne nuamaw sejsenpa.

Metzelnamikit!

Taja tay tina kwak ajkwechuat?

Kwak niajkwechua, miak nechilwiat: Bless you. Wan naja nina: Thank you.

Ka nuchan tik Los Angeles, ijkiuni titaketzat tik Inglestaketzalis. Te nikmati taika. Inte aka ina tatka kwak titatasit ush timuyakapitzat. Kwak tiajkwechuat, kia. Ken ijtuk?

Yek ne Nawat nitaketza?

Ne Nawataketzat ishpajpakit su tiktasujta ne intaketzalis.

Nugustuj ne Nawat wan nikneki!

Tay muneki muchiwa pal timumachtiat se taketzalis

Shimumachti mujmusta,
melka chiupichin!

Kwak nipejki nimumachtia ukse taketzalis, nimumakak cuentaj ka nemit sejse tay tiwelit tikchiwat pal timumachtiat yek wan talul. Taja nusan tiweli timumachtia Nawat su tikchiwa ini tay niaw nimetzilwia:

1. Shimumachti mujmusta

Shimumachti mujmusta su weli. Te muneki ma shimumachti miak horaj. Su timumachtia ijtik 20 ush 30 minutoj, nemi yek! Melka chiupichin, shimumachti muchi ne tujtunal, kiane tiaw tiweli tikelnamiki ne tay timumachtijtuk.

1932: Nikan nemit!

Fotoj: Werner Hernández (Ishkalamat)

Ne noymet te kanaj,

tea chachalakat:

ashan nawpual-ume shiwit,

tik ne shiwit 1932,

mukawket,

mikiket,

kinmiktijket

senpual-majtakti-mil kupak.

Te kinekit mumachtiat Nawat ika ishpinawat (videoj)

Nikan tikakit ume Nawataketzat, Paula Lopez (ipal Witzapan) wan Luciano Nolasco (ipal Nawisalku). Yejemet inat ka ne inpilawan te kinekit mumachtiat Nawat. Tejemet kia tiknekit!!

Se iswat ipal se iamaw Genaro Ramirez

Genaro Ramirez Vasquez, Nawataketza pal Witzapan

Genaro Ramirez se Nawataketza ipal Witzapan (ne nusan itukay tik Castillaj Santo Domingo de Guzmán). Yaja kichiwtuk wey pal kipalewia wan tamachtia ne taketzalis; nusan kitawawasujtuk sejse amat. Ashan tiawit tikitat se takutun ipal ne iamaw itukay Naja Ni Genaro, ne kiajshitij IRIN tik 2004. Tiaw tikita ka Genaro ina sejse taketzalis ken taketzat ne tukniwan ipal Witzapan.

Tay kineki ina CHACHALAKA?

Ne Nawat kipia ken tinaskiat ne tay mukaki, muita, mumati u muchiwa te semaya seujti sute sejsenpa.

Kwak se tata, welit tinat: chichinaka.
Kwak se chuka ika kikukua wey, welit tinat: yaja kikinaka.
Kwak mututunia sujsul ne at hasta mukaki, tinat: ne at kwakwalaka...

Kwak ne et nemi waktuk ijtik iewayu, mukaki ken se matracaj; welit tinat ka yaja chachalaka. Wan su tejemet titajtaketzat wey, welit inat kenhaya ka tejemet nusan tichachalakat.