Ne ajkayawit Matthew sea kishutak Haitij

An makwil shiwit neman keman talulinik ne 12 eneroj 2010, ne ajkayawit kiwilewki ukpa ne Republicaj Haitij, ini ajkayawit sea tetekia. Ne yalua ipal ne martes 4 octubrej 2016, Matthew tawilewki nujme nejnenki, tawilewki sujsul ne taltakutun Grand'Anse wan ne tatzinu-taneskan. Ne chanejket inte tatka kipiat ika muchi kipulujket, wan sajsaytit ika walajsis neman se uijkayu ipal takwal wan ne coleraj.

Ka ajkuik, nemi se fotoj ipal ne taltakutun tatzinu Haitij, itukay Jeremie, kan tawilewki sea ne ajkayawit Matthew. Tikitat kajkal te iwan itzunkal, ne techan muwilewtuk, ken su panuk ne Apocalipsis, ken su panuk se tasumalis. Ka né miak tukniwan sujsul taekujket. 

Tik seuk techan, itukay Corail, ne kajkal muwilewttiwit, akalaktiwit, wan ne ajakal mukejkeluntiwit, Nemi seuk taltakutun, nw Goave: Petit-Goave kipia 21 mikini, mas de 1500 kal ijtakawtuk, 150 muwilewtuk. Grand-Goave kipia 7 mikini, 1133 kal ijtakujtuk wan 215 muwilewtuk.

Nusan, ne kalkukuyanit pejki kikwi tukniwan ká kipiat coleraj ne domingoj. Yalua se takat mikik ika kipishki coleraj, wan sekit chikwasen nemiket pal nakat ka né, melka ne kalkukuyanit semaya kipia makwil tapechti ipal ini tipoj kukuyani,

Ipanpa muchi ne tay panuk, ne kalpuli inak ma muchi mutechtilikan yey tunal.

• ajkayawit: huracán, lluvia con viento 
• talulini: haber terremoto 
• nujme: por todos lados 
• tatzinu-taneskan: sud-este 
• walajsi: venir, aproximarse 
• taekua: sufrir 
• akalaki: llenarse de agua, inundarse 
• mukeluna: quebrarse 
• sajsayti: ponerse en peligro, estar en peligro
• mutechtilia: entristecerse.