Ne ESA tea tatuktia tik ne matapan

Ne Kalpuli pal ESA tea yawi kitekimaka Icann. Icann kitukaytia muchi ne tzajtzawalamat tik ne matapan. Wan kitajpia ne metapan ma naka tapujtuk wan yektalijtuk.

Ken ka ajsik tatuktia Hitler? (1/2)

Ken ijtuk iwan ne Alemania democraticoj taltechan kan welik ajsi tatuktia se tetalultiani? Ini ne takat kimiktij miak takamet, siwatket wan kukunet ika yejemet Yudayujmet.

Tiawit tikilwitiat ken mumatki ne techan kwak tamik ne Achtu Tasumalis. Wan taika miak takamet kishwelitaket tay yaja inatuya.

Ken ijtuk iwan tuweyka tik ne ilwikat?

Ne ESA sitalpashaluani Scott Kelly wan Rusia sentalpashaluani Mikhail Kornienko panuket 340 tunal tik ne ilwikat.

Kwak achtu pejket pashaluat tik ne ilwikat, NASA senpa kinekituya kimati ken ijtuk iwan ne tuweyka kwak tinemit tik ne ilwikat, kan te kanaj etilis. Ika tik ne taltikpak, ne takat nejnentuk iwan etilis wan mupetejtuk iwan.

Matthew: ne tapayawit tapitza pak ne taltakutun kalakian ipal Haitij

Ne ajkayawit Matthew yawi yawi ishta ajkuikpa wan inte musewia. Kichaluj ne atenpan Haitij ka tajkutunal. Tapitza iwan ejekat ajsi achka 220 km/h, nemi tapayawit tesajsay, wan ne at inte muajkawa wetzi. Ne ajkayawit kimiktija 3 tukniwan. Ne iakal se takat akalak, seki mikik kwak ichan muwilewki, wan se siwat sea kukushki wan inte weliket kitajpiat. Seuk takat mupuluj.

Kitapanket ukpa ne majwey kalkukuyanit ipal Alepoj, Siriaj

Kitapanket ukpa ne kalkukuyanit majwey ijtik ne cojcoloniaj te takakini ipal Alepoj ini semanaj. Ne  tatuktilis ipal ne tal iwan itepalewianimet rusojtekat kichiwat ne campañaj inwan intasumanimet wan uk kinekit kitzkiat muchi ne techan ume ipal Siriaj.

Ne tzajtzini ipal ne tajkuyua

Tik Kuskatan tikpiat miak sisimit pal ikman.

Kwak nichikitik katka, ninemituya tik se techan itukay Aguilares. Tesu tikpiatuyat tawil ka né. Yajika, kwak tayuaki katka, nemi kunyua nujme. Ka tayua, ne nutatanoy mutalia katka ka tenkal wan tachichina. Ne nueltiwan wan naja timutaliat katka inawak wan yaja techilwia ipanpa se sisimit pal ikman itukay ne “tzajtzini ipal ne tajkuyua”.

Kineshtiliat itachishka se weykuke

Sejse taishmatini kineshtilijket ne itachishka se ikman weykuke ne nejnemituya ijtik ne kujkujtan tik China ashan 120 millon shiwit. Kalishtijket ne iujumiu wan kitaket ka kenhayuk kipiatuya ne ishinyu. Ne iten kenha ken se alut wan ikwitapil kipiatuya iujmiu.

Ne achtu muishnamikilis tik ESA

Ne muishnamikket: Donald J. Trump wan Hillary Clinton

Yalua Donald Trump wan Hillary Clinton nemiket tik ne achtu muishnamikilis pal kianat ne achtumutalijka pal ESA. Ne chanejket yawit kishpejpenat se yejemet ijtik ume metzti.

Teishpejpenalis tik Euskal Herria

Yankwik Sennemit Vascoj: miak
nacionalistaj, miak siwatket,
melka te kanaj musenputzulis

Yalua domingoj muchijki teishpejepnalis pal ne kalpuli ipal ne Euskadiko Autonomi Elkartea (Chinamit Iseltuktiani Vascoj, "CHIV"), se takutun ipal ne estadoj ipal España kipia iseltuktilis.

Musewia se techan ini tayua

Ne tatuktiani pal Charlotte, ne wey techan tik North Carolina, kitalijtuk tik ini tunal se musewilis kan teaka weli nejnemi ka tatenpan itzalan tajkutayua wan tanesi.

Ashan ne yey tunal kan se miaktal teishnamiki tik ujti. Yejemet kitajtaniliat ne tajpianimet ma kineshtilikan ne videoj kan kilwitia tay panuk iwan Keith Lamont Scott, ne kipiatuya 43 shiwit. Yajini ne takat ká se tajpiani kimiktij.

Ne Tepemichin

Ne Tepemichin

Anka ne michin ne sea kielewiat wan kinekit ne taitzkianimet ne tepemichin. Tejemet teuk tikmatit muchi ipanpa ken ini talul michin muteleksa wan takati. 

Inat ka yaja tejku tik ne apan chipawak ashta ne itzunpan, ika yaja weli semaya tapishua itejteksis tik ne at ne kipia wey oxigenoj wan ne kan te kanaj tajsul. Melka, ne michin muita ka weli nemi tik susul at wan ashta iwan shapun! Pero, su nemi kiané, yaja inte weli muteleksa wan te keman yawi mumiakchiwa. Ini michin puliwijtuk tik achka muchi ne ajapan kan muajsituya. Né kan nemiuk, anka semaya ka né, tik ne itzunpan ipal ne cuencaj Barra de Santiago, kan nemi ne kojtan el Imposible, El Salto wan sejseuk chikitik kojtan nemitiwit. Inat ka kwak tapishujtuk ne tepemichin, itejteksis mutilanat iwan ne at ashta ne washtan, kan panu ne seuk taksalis ipal icicloj yulnemilis. 

Melka achka muchi ini mijmichin chijchikitik, welit weyat ashta 30 cm. wan ietekkayu achi se libraj. Inat ka inakayu ne sea yek weli tikitzkiat tik ne at.

Anka su tiajsit tikpalewiat ne chiujchiupi nemitiwit tik wan inawak El Imposible, tiwelisket tikwikat tik seuk ajapan tapalewijtuk. Tepemichin nusan ne itukay se techan tik ne taltakutun La Unión, wan se tepet tik San Miguel. 

Tikpalewikan ne nawat, wan tikpalewikan ne tepemichin!

Kanka witzet ne Lenka

Ne tipan Lenka tik Watajiawa

Nemi tik Kuskatan se techan Metzali itukay ne Lenka. Melka yejemet tea welit tanutzat tik ne Metzalitaketzalis, sejse yejemet kenhayuk tajtaketzat ipanpa ne ikman panutuk.

Tik uni takutun ipal ne republicaj miak te kimatit tatka ipanpa de Metzali. Semaya sejse tik se techan itukay Watajiawa (Guatajiagua) kielnamikit wan tajpiat uni tamatilis. Ini ne tipan techan kan nakaket sejse Metzali Lenka ne te kielkawtiwit wan kimatit ká yejemet.