Miktan tik ne at

Nemik se takat kitzkia michin. Wan kitak ka ajsik se chulet inawak. Wan yaja kitzkij wan kitilan wan kiwikak ka ichan.

Ne iweyka ne takat kiajsiket miktuk, wan kiwikaket ichan wan kitaket ka miktuk, wan kitukaket.

Wan se tunal kitaket ka ajsi yawi, wan kimatit ka kipiaya kashtul shiwit ka miktuk.

Yejemet kielnamikit kwak yajket kalkwit, kiwikaket ichan, wan kitaket ka kitukaket. Wan ken ka walmukwepki?! Yajika, kwak ne kitaket, nakaket kishpelwiat. Wan kwak kitaket ka yaja né, kisket mutaluat ika majmawit.

Wan yaja, kwak kitak ka mutalujket, kalak kalijtik. Kwakuni pejket ajsit chiujchiupi tachiat, wan kitaket ka yaja. Kisket senpa mutaluat.

Kwakuni kiski yaja kinnutza. Wan kwak kitaket yejemet ka yek, nian kukushtuk wan yek nesi, kwakuni weliket kinutzat, wan kilijket:

“Tejemet tikmatit ka taja timiktuka. Tejemet tikitaket ka tiajket talmetzkwit kwak ne tiatukuk, wan tikitaket ka timetztukaket. Wan ken ka unkan tiwitz?”

Ne takat kinhilwij:

“Su naja inte nikmati su naja niatukuk! Naja semaya tay nikitak ka ajsik nunawak se chulet wan kitzkij ne numey wan nechtilan tik ne at. Wan tipejket tinejnemit tik ne at. Nikitak ka kan ne chulet nejnemi, muchayawi se ujti kan panu. Wan yaja waktuk. Inte ajwi ne chulet.

Ne tenkal ipal at

“Wan kwak ne tiajsiket, nikitak ka kitapuj se tenkal. Yajasan at! Wan kwak tikalakket, yaja mukwepki senpa tatentzakwa.

“Wan nikitak ka musentepewat. Né nemit chujchuletket wan lajlamatket. Wan tejemet kwak ne techwikat, muchi munujnutzat pal yawit techitat. Kwak tami ajsit muchi yejemet, kwakuni kinutzat muchi ne mijmichin iwan ne kuleken kipitza ne chulet.

“Nikitak ka ajsit ne tenkal pal techishpelwiat, wan ne chujchuletket muketzat kinhilwitiliat, ka techwikatiwit ne tejemet takamet.

“Muchi yejemet né nemit tik ne sejseuk kal wan kipiat ne at. Ne at kikwit pal ne tay yejemet munekit: pal kiunit wan pal mumapakat.

“Neman tikpakat ne inhikshi wan ne inmey. Semaya ne inhishkalyu ne tay yejemet kipakat. Kwak tamit tikpakat ne inmey wan ne inhikshi, kwakuni timutaliat tikatinwiat. Melka nemit sejseki, tejemet kenhaya nemit pal tikatinwiat. Wan kiané tikchiwat muchi ne pejpeyna.

“Kipia sejse takat se taijtik kan nemi chiujchiupi at. Wan uni taijtik ipal teukwitat. Wan inte tikitat asu kiunit ne tay uni tiktaliliat. Kwak tayuaki, ne taijtik intea kipia ne ajat, wan inte tikitat keman ne kiunit.

“Wan nikitak ka kwak tatwi, naka istak nujme. Yaja kwak ne tunal pewa tachia ijtik ne at, yajika istaya ne at.

“Wan uni kwak ne tiu-tikwit uni at. Yaja ne kwak yawit yejemet kienchiwat. Munujnutzat wan yawit kitaliat ne inmey. Yaja né kwak ne mukaki ka tikwini tik tal. Yejemet inte kichaluat, uni ika kitaliat ne inmey wan kipachuat katani.

“Wan yejemet inte takwat ken tejemet. Kipiat se kwawit ne kichiwa ne itakil. Kwak tayuaki, inte nesi su naka se itakil, wan kwak yawi tatwi kipiaya tey ne tiawit tikwat uni tunal.

“Wan ne iiswayu inte nikita su shushuknaj wan te nikmati tay; semaya muita ka nesi kunyua. Wan uni kwawit kipia yejyey iiswayu. Wan yawi ka ajku, wan ne iiswayu nemit itech ne ikuyu, wan kenhaya ken se kutejkuni. Katani kipia ne se wan kipia ne seuk; uni yawi ka ajku.

“Nemik se tunal kwak nikitak ka welik nikwi se ne iwan tanutzat pal ajsit muchi ne mijmichin wan pal kichiwat kan panu. Inte sesan, nemit miak kuleken. Wan welik nikinaya se; wan kwak muketzki ne chulet, welik nikpitza naja. Kwakuni tapuik ne tenkal wan muchiwki ne ujti kan ne welik nikisa.”

Referendum: 90% tik Katalunya taishpejpenket ipal tamakishtilis

Iwan 95% ipal ne taishpejpenal pujtuk, ne iKalpul Katalunya inatuk ka ne 90.09% ipal ne taishpejpenani kishpejpentuk pal mumakishtiat itech Kastiya.

Ne taishpejpenalamat san tajtani: “Tikneki ma Catalunya mukwepa se taltechan ken ne itachialis se techantatuktilis? Nemit ume tay welit kishpejpenat: E wan Te.

Ikshitachti: Kuskatan mawiltia itech ne Ejestadoj Senputzujtuk

Yewipta ne ikshitachti tepewa ipal Kuskatan kitzkij ne itakil 1 tech 1 kwak mawiltij itech Jamaica. Iwan ini itakil kipanultia ne achtu taksaya. Tik ne ukse taksaya iwan chikwey tepewa, yawi muishnamiki iwan ne Ejestadoj Senputzujtuk.

Kineshtijket se kuyut wan teukwitat itan Meshijku

Tik itajku ne yultechan pal Meshijku kineshtijket se miktijtuk kuyut. Yaja takentijtuk iwan kustik teukwitat tachijchiwal.

Nemit 22 tachijchiwal tik ne taneshtilis, kan ne nemi se tapilul iwan machiut, se yakatet, wan se elpantepusti. Muchi muchiwtiwit iwan pitzawak tepusti.

Comey taneltilia ipanpa itenamikilis iwan Trump

Ne tajtzin James Comey kitejtenewki ne ikaltajpialis ne tatuktiani Trump ika yejemet sanka inaket. Ashan se metzti, ne tatuktiani Trump kitekitaski ken itekuyu ne FBI. Ini panuk kwak yajaya kitejtemua ne campañaj pal Trump wan Rusia.

"Ne kaltajpialis kiejekuj nechtejtenewa wan nusan ne FBI," inak kwak pejki itaneltililis ishpan ne Sennemit pal Tamatilis tik ne Senadoj. Tajtzin Comey inak ka ne tatuktiani Trump sanka inak ipanpa tay panuk.

Trump kiajkawa ne munujnutzal pal Paris

Ne tatuktiani Donald Trump inak ka ne Ejestadoj Senputzujtuk yawi kiajkawa ne munujnutzal pal Paris. Ini se munujnutzal ne kiajshitijket 195 taltechan tik 2015 pal te kisa tatutunilis ijpeyak tik ilwikak wan pal kashawa ne tatutunilis.

Ken ijtuk iwan Ajkuikpa Korea?

Ne Ejestadoj Senputzujtuk wan Ajkuikpa Korea senpa mutejtenewat. Melka ini shiwit ne ujume mupejpewaltiat, wan nusan pewat munetechuat. Ne tatuktiani ipal Ajkuikpa Korea itukay Kim Jong-un wan ne tatuktiani ipal ne Ejestadoj Senputzujtuk itukay Donald Trump.

Ne 'MOAB' tapanka kimiktij 36 tasumanimet ipal ISIS

Ini ne achtupa ne tasumantal pal ne Ejestadoj Senputzujtuk (ESA) kikutamutatuk ne 'MOAB' tapanka tik tal. Ne ietilis ne tapanka 21,600 lb wan ipatiw $16 millón. Yaja itukay 'MOAB' (tik Nawat, ne inan muchi tapanka).

70 miktiwit tik tepewiltilis iwan gas tepajmiktia ka Siria

Miktiwit 70 tukniwan, ijtik yejemet 11 kunet, tik se tepewiltilis iwan se “gas tepajmiktia” tik se techan itan ne itatuktilis ne takumuntianit ka Siria, itukay Khan Shaykhun, ijtik ne taltakutun ipal Idlib. Ne “Tapachiwiluyan ipal ne Tay Ipal Muchi Tukniwan ka Siria” (SOHR tik ingles) ina ka kikwijket gas ika miak nemituyat muijiutzakwat wan majmatamit wan tenpupusukat.

Ne chanejket inat ka pejki ka tapuyawa, achka 6:30 am, keman kikakket tepuspatanit ka ajku wan nemanha miak tatapanilis tajpaltik. Ne tekniwan pejket kukuyat talul. Inaket ka inte weliket kishmatit ne tepuspatanit, melka ne kalpuli ipal Siria wan Rusiaj kikutamintiwit bojbombaj yewa ijpak ini techan. Rusiaj ina ka inte nemiket ka né uni tunal. Ne kalpuli ipal Siria inatuk miak wipta ka inte keman kikwijtuk ush kikwis tajtamiktijka ijkiuni. Melka uni, ne Tejtechan Senputzujtuk (TS, ush ONU tik kastiaj) kiajsituk yeshpa ka kia kikwijtuk, wan ne mutewelnekilis wan ne tetajpalmet ipal occidentej kalnamikit ka ne kalpuli ipal Siria kaj kichijki ini tepewiltilis.

Tepewiltilis tik Londres: Khalid Masood ne temiktiani

Se tepewiltiani kimiktij nawi wan kikukuj achka unpual kwak yaja tayakanki ujtenpan tik Westminster. Yaja kitzuntek se tajpiani wan kitamutilij seuk tajpiani tik ne Munujnutzaluyan.

Ne tajpianimet kitukaytijket Khalid Masood, 52, ken ne temiktiani. Nusan inat yaja se Islamistaj temujmutiani.

"Ne Ujti Te Taksat"

Senpa tinemit pal titapejpenat, melka ken tikmatit su tutapejpenalis ne yek u ne te yek? Robert Frost tajkwiluj ipanpa tik ne ishuchitajkwilul itukay "The Road Not Taken".

Ne itatzinpewaltilis Donald J. Trump

Ashan muchiwki ne itatzinpewaltilis ne yankwik tatuktiani pal ne Ejestadoj Senputzujtuk, Donald J. Trump, wan ne yankwik ipatka-tatuktiani, Michael R. Pence. Yaja kitekak se imey ijpak ne Bibliaj wan kitejkultij ne ukse imey pal kimaka itaketzalis. Kwakuni, yaja tajtaketzki chiupi.