Ken ijtuk iwan Ajkuikpa Korea?

Ne Ejestadoj Senputzujtuk wan Ajkuikpa Korea senpa mutejtenewat. Melka ini shiwit ne ujume mupejpewaltiat, wan nusan pewat munetechuat. Ne tatuktiani ipal Ajkuikpa Korea itukay Kim Jong-un wan ne tatuktiani ipal ne Ejestadoj Senputzujtuk itukay Donald Trump.

Ini ken ijtuk:

8 Abril: Ne tasumantal ipal ne Ejestadoj Senputzujtuk (ESA) kituktia se akalpul ma ajsi ne ajat itech Korea.

11 Abril: Se tanawatiani ipal Ajkuikpa Korea ina ka yawit mutajpiat “iwan ne itajpal tumatepuswan.”

15 Abril: Ajkuikpa Korea kishpanua ne imatepuswan wan itamimalwan tik se tayawalulis. Ini tayawalulis kimachiutia ne 105 shiwit panuk ne itakatilisilwiw ne achtu tatuktiani, Kim Il-sung. Ikuka ne Ipatka-Tatuktiani pal ESA Mike Pence ejku tik Tatzinu Korea.

16 Abril: Ajkuikpa Korea kitasa se tamimal melka tapani kwak ne ajkukisa.

17 Abril: Ne Ipatka-Wejka Tanawatiani, Han Song-ryol, ina ka ne taltechan senpa yawi kiejekua ne itamimalwan. Mike Pence kinajnawatia Ajkuikpa Korea ma te “kiejekukan ne itechikawalis” Donald Trump.

18 Abril: Nesi ka ne akalpul te ajsit ne ajat itech Korea, sute itech Australia pal muejekuat.

22 Abril: Mike Pence ina se akalpul ne kiwika tejtepustutut yawi ajsi ne ajat itech Korea “ijtik sejse tunal”.

23 Abril: Ajkuikpa Korea ina ka “yeka pal kiatuka” ne akalpul pal ESA, itukay Carl Vinson.

25 Abril: Se atankalpul pal ESA ajsi tik Tatzinu Korea, itukay USS Michigan.

26 Abril: Ne Istak Kalpul kinujnutza ne sentzunti tekitinimet ipal ne Sennemit pal kikwitiat tenawatilis ipanpa Ajkuikpa Korea.

• ajkukisa despegar, subir, elevar
• akalpul buque
• atankalpul submarino
• -atuka ahogar, hundir
• -ejekua probar, ejecutar
• ejku llegar, atracar, arribar
• ikuka entonces, mientras
• Ipatka-Tatuktiani vicepresidente
• Ipatka-Wejka Tanawatiani vice-ministro del exterior
• Istak Kalpul Casa Blanca
• -machiutia marcar
• -matepus(wan) arma(s) de
• muejekua ejercitarse en armas
• munetechua arrimarse, repegarse
• mupejpewaltia provocarse
• -najnawatia procurar, advertir
• -nujnutza convocar
• -takatilisilwiw cumpleaños de, día de nacimiento de
• tamimal(wan) misil(es), proyectil(es)
• tanawatiani ministro, persona de autoridad
• tayawalulis procesión, desfile; rodeo
• techikawalis resolución, ánimo, valor
• tejtenewa despreciar, enemistarse
• tenawatilis instrucción, información