Ne takat wan ne atimet

Ini se cuentoj ipal ne Nawataketzat ipal Guerrero (se taltakutun ipal Meshijku), nikpatak tik Nawat pal Kuskatan. (Welit tikitat tik ne taketzalis ipal Guerrero ka nikan.) Ashan pewa ne cuentoj:

Se takat kipiatuya se atimet. Muilwia:

“Niaw nikishtuka ini atimet tik se botellaj wan niu-niktumawaltia. Kwak yaja tumawak, niu-nikshipewa wan iwan ikwetashyu niu-nikchiwa se wewet, ika sujsul nugustoj ne wejwewet.”

Kichiwki kiane wan sujsul yektzin. Se tunal, kiwikak ne wewet tik se ilwit wan tatzutzun. Muchi ingustoj uni wewet. Kitajtanket:

“Kan tikajsik ne kwetashti pal tikchiwa ne wewet?”

Ne takat kinhilwij:

“Yaja ne ikwetashyu se wey animal.”

Kinhilwij ijkiuni ika tesu kineki kinhilwia ne tejkia. Pero ne sejseuk sujsul kitajtanket. Ne takat tamik kinhilwia ka yaja ne ikwetashyu se atimet. Nusan kinhilwij:

“Ne ikwetashyu ne atimet sujsul yek pal tikchiwat wewet iwan.”

Kilwijket:

“Shitechnamakili ini wewet wan shikchiwa seuk.”

Yaja kinnamakilij ipatka wey tumin. Melka uni, kishijshikujket ika te keman kichiwki ukse wewet kenha. 

Tamik ne cuentoj!

• atimet piojo
• ilwit festividad, fiesta
• ipatka a cambio de
• ishtuka introducir, meter
• kwetashti piel, cuero
• -kwetashyu (su) piel
• Meshijku México
• muilwia se dice a sí mismo
• -namakilia vender a (alguien)
• -pata traducir
• -shijshikua engañar
• -shipewa despellejar
• taltakutun departamento, región, estado
• tatzutzun tocó
• -tumawaltia engordar
• -tzutzuna tocar (un instrumento musical)
• wewet tambor