Ne ESA tea tatuktia tik ne matapan

Ne Kalpuli pal ESA tea yawi kitekimaka Icann. Icann kitukaytia muchi ne tzajtzawalamat tik ne matapan. Wan kitajpia ne metapan ma naka tapujtuk wan yektalijtuk.

Muchi ini tapatalis iwan Icann pejki ika tajtaltechan ken China wan Rusia tanawatijket ka nemiskia ukyek su tatuktia ne International Telecommunications Union (ITU), ipal ne Talmet Sejsenputzujtuk. Ika su Icann kichiwa se tay ne Kalpuli pal ESA tesu kishwelita, yejemet welit kipatat.

Ashan se chikuntunal, ne Technology Industry Council (ITI), kitajtawelij ini tapatalis. Melka uni, ne tetajtaniliani kishwelitak ne tapatalis. "Ini tapatalis yawi kitajpia ne matapan tapujtuk pal kikwi muchi ne taltikpak," inak.

Ne Icann yawi mukwepa se tepewa kan miak kipiat se sentakutun wan teaka weli kikwi nian se tumin. Tesu kitekimaka ne ESA sute miak tawelmatinimet, tamachtianimet, wan nusan tajtaltechan. Yejemet yawit kitukaytiat ne tzajtzawalilpika.

• chikuntunal semana
• -ishwelita aceptar, agradar
• matapan internet
• tanawatia acosejar, consultar (algo)
• sentakutun fracción
• -tajtawelia demandar
• Talmet Sejsenputzujtuk Naciones Unidas
• taltechan país
• tamachtiani maestro, académico
• tapujtuk abierto
• tatuktilis autoridad, poder
• tawelmatini experto
• -tekimaka regir, dirigir
• tepewa grupo
• tetajtaniliani juez
• -tukaytia nombrar
• tzawalamat página web, sitio web
• tzawalilpika dirección web
• ukyek mejor
• yektalijtuk en orden, ordenado