Trump muweymati ika Ford tea mijkwania tik Meshijku

Tik Kentucky ne Ford Motor Company kichiwa se machiut ipal ne Lincoln tawikani. Yejemet kinekituyat kijkwaniat ne itachiwalis uni machiut tik Meshijku. Ini mijkwanilis te kishtilia nian se tekit ipal ne tachiwaluyan tik Kentucky. Uni tachiwaluyan kenhayuk kitakewa miak takamet.

Ne tepewa te kinekituya kijkwania nian se tekit. Semaya kinekituya kiweyaltia ne itachiwalis. Melka ini, ne tepewa neman inak ka tea yawi mijkwania.

Kwak ne tepewa inak uni, Donald Trump kinutzki ne itekuyu Ford. Kwakuni, Trump kitalij tik Twitter, "Nitekitki wey iwan Bill Ford pal niknaktia ne Lincoln tachiwaluyan tik Kentucky."

Ford inak ka tea yajtuya mijkwania kwak ne kinutzki Trump.

Donald Trump kianki ne teishpejpenalis ika tatenewa ka yajaya yawi kalkwi tejtekit ipal ne chanejket. Tajtzin Trump muweymati ipanpa ini.

Ford inak ka tea yawi mijkwania tik Meshijku. Wan te yajtuya kitentzakwa ne tachiwaluyan tik Kentucky. Ini te inasneki ka yawi nemi miak tejtekit, sute inasneki ka te yawit kichiwat miak ipal ini tajtawikani ne te wey ipatiw.

• -al-kwi traer (para acá)
• -ijkwania mover, apartar, trasladar
• inasneki querer decir
• kinutzki lo llamó (de -nutza)
• machiut modelo, señal, ejemplo
• mijkwania apartarse, moverse, trasladarse
• mijkwanilis traslado, mudanza
• muweymati jactarse
• -naktia dejar
• tachiwalis producción
• tachiwaluyan fábrica
• -takewa emplear, dar trabajo
• tawikani carro
• teishpejpenalis elección
• -tentzakwa cerrar
• -weyaltia engrandecer
• yajtuya iba